Л.Энх-Амгалан: Тойргийн бус хүүхэд элсүүлсэн сургууль, цэцэрлэгийн эрхлэгчдэд хариуцлага тооцно

2022-08-09 18:51:00

Цэцэрлэгийн хүүхдийн бүртгэл маргаашнаас эхэлнэ. Үүнтэй холбоотойгоор өнөөдөр БШУЯ-наас мэдээлэл хийлээ. Энэ үеэр нийслэлийн удирдлагын шинэчилсэн төлөвлөлтөөр 204 хороон дээр хамран сургах тойргийг зарлаж, төрийн болон төрийн бус цэцэрлэгүүдийн багтаамж дээр суурилсан төлөвлөлтийг хийж, шинэчилнэ гэж БШУ-ны сайд Л.Энх-Амгалан мэдээллээ. 

Тэрбээр, "Төрийн цэцэрлэг, сургуульд хамран сургах тойргийн бус хүүхэд бүртгэдэг тодорхой авлигын сүлжээ байсныг нуухгүй. Тухайлбал, Нэгдүгээр сургуульд элсэн ороход нэг сая төгрөг авч, орон сууцныхаа ордер дээр бичүүлж, түүгээр нь бүртгэл хийдэг сүлжээ байсан. Иймд АТГ-тай хамтран энэ жилийн цэцэрлэг, сургуулийн бүртгэлийн ил тод, нээлттэй, шударга байлгах бололцоог бүрдүүлж ажиллана. Эцэг, эх асран хамгаалагчид болон төрийн бус байгууллага бидэнтэй хамтран ажиллах ёстой. Цаашид ямар нэг шалтгаанаар тойргийн бус хүүхэд элсүүлсэн сургууль, цэцэрлэгийн эрхлэгчтэй хариуцлага тооцох алхмыг эхлүүлж байна" гэлээ. 

Нийслэлийн ачаалалтай сургууль, цэцэрлэгийн сурагчдын 40-50 хувь нь тойргийн бус хүүхэд байсан гэдэг нь судалгаагаар тогтоогджээ. Тиймээс энэ жилээс хүүхэд бүр тухайн хамран сургах тойргийнхоо цэцэрлэг, сургуульд бүрэн хамрагдах боломжийг нь тэгш олгоно гэв.