УИХ-ын гишүүн асан Л.Эрдэнэчимэгийг Хөгжлийн банкны сонсголд гэрчээр дуудсан ч ирсэнгүй

2023-03-16 10:06:00

Хөгжлийн Банкны асуудлаарх гурав дахь шатны сонсгол Төрийн ордонд үргэлжилж байна.

Сонсголын эхэнд Экспортыг дэмжих, импортыг орлох үйлдвэрлэлийн 888 төслийн хүрээнд 56 гэрч дууджээ. Хэлэлцэх асуудалтай холбоотойгоор тухайн үеийн Ерөнхий сайдын зөвлөхөөр ажиллаж байсан УИХ-ын гишүүн О.Цогтгэрэлийг гэрчээр дуудсан байна. Түүний хувьд сонсголд хүрэлцэн иржээ.

"Монос групп" болон "Энхийн шүүдэр" ХХК-тай холбогдуулан УИХ-ын гишүүн асан Л.Эрдэнэчимэгийг гэрчээр дуудсан ч гуравдугаар сарын 14-ний өдөр Бүгд найрамдах Болгар улсад томилолтоор явж байна, оролцох боломжгүй тул гэрчийн мэдүүлгийг бичгээр өгөх хүсэлтээ ирүүлсэн байна.

Мөн "Алтай" группийн ерөнхийлөгч Х.Бат-Эрдэнийг гэрчээр дуудсан боловч ирэх боломжгүй гэсэн албан бичгийг ирүүлж, өөрийг нь төлөөлөх М.Дамбасанжаа гэх хүнийг сонсголд оролцуулахаа албан бичигтээ дурджээ.