АИ92 шатахууны үнийг 2024 он хүртэл нэмэгдүүлэхгүй гэв

2023-01-19 12:23:00

УИХ-ын чуулганаар “Тогтоолд нэмэлт, өөрчлөлт оруулах тухай” УИХ-ын тогтоолын төслийг хэлэлцэх эсэхийг хэлэлцэж байна. Уг тогтоолын төслөөр АИ92 шатахууны онцгой албан татварыг чөлөөлөх эрхийг Засгийн газарт олгоно.

Хэлэлцүүлгийн үеэр Уул уурхай, хүнд үйлдвэрийн сайд Ж.Ганбаатар АИ92 шатахууны үнийг 2024 он хүртэл нэмэгдүүлэхгүй гэдгийг хэллээ. 

Тэрбээр, "ОХУ-д түүхий нефтийн үнэ бууж байгаа. Эцсийн бүтээгдэхүүн биш. Манай улс эцсийн бүтээгдэхүүнийг биржээс худалдаж авдаг. Биржийн үнэтэй холбоотой. Өнөөдрийн байдлаар нэг тонн АИ 92-ыг 758 ам.доллароор худалдан авч байна. Энэ бол маш хямд үнэ. Ерөнхий сайд Роснефттэй хэлэлцээр хийгээд нэгдүгээр сарын 1-ээс энэ үнээр авч байгаа. АИ92 2400 төгрөг байгаа. Энэ тогтоолоор энэ үнийг тогтворжуулна. Буулгахгүй, харин цаашдаа үнийг нэмэгдүүлэхгүй байх зорилготой. Дэлхийн зах зээл дээр огцом өөрчлөлт гарахгүй бол 2024 он болтол энэ үнийг барихыг зорьж байгаа" гэв.