Япон улсын иргэнээс 4.2 тэрбум төгрөг залилсан Монгол иргэнд зургаан жилийн хорих ял оноожээ

2022-10-28 10:28:00

ХЗДХ-ийн сайд Х.Нямбаатар гадаадын хөрөнгө оруулагчдыг хохироосон 57 хэргийн талаар прокурорын зөвшөөрлөөр олон нийтэд мэдээллээ.

Гадаадын иргэн, хуулийн этгээдээс Монгол Улсад хөрөнгө оруулж хохирсон нийт 57 хэргийн 20-ыг нь хааж, 15 хэргийг хэрэгсэхгүй болгосон байна.

Тодруулбал, Япон улсын иргэн Такахама Кеничи нь их хэмжээний мөнгөө залилуулсан гэх хэрэг гарсан. Монгол Улсын иргэн О.Болд нь Япон улсын иргэн Такахаматай Монгол Улсад банк бус санхүүгийн байгууллага байгуулан хамтран ажиллахаар тохиролцож, Ориентал капитал, Ориентал инвест гэдэг компанийг байгуулж, хуурамч данс, хуулга, санхүүгийн тайлан гарган Япон улсын иргэнээс 4.2 тэрбум төгрөгийг залилсан талаар салбарын сайд нь мэдээллээ.

Тус хэргийг 2018 онд нээсэн байна. Хэрэгт Эрүүгийн хуулийн тусгай ангиар зүйлчлэгдэн яллах дүгнэлт үйлдэн Сүхбаатар дүүргийн эрүүгийн хэргийн анхан шатны шүүхэд шилжүүлжээ. Шүүхээс 2022 оны тавдугаар сарын 30-ны өдөр иргэн О.Болдод зургаан жилийн хорих ял оногдуулжээ.