СОНИН ХАЧИН: Дэлхийн хамгийн аюултай ширэнгэн ой

2022-10-20 15:05:00

Пан-Америкийн хурдны зам бол Аляска дахь Прудо Бэйгээс Аргентины Ушуайяа хүрэх 30577 км-ийн урттай зам юм. Дариэний хоолой хэмээх Панамын өмнөд хил дээрх нутгийг эс тооцвол тус зам тасралтгүй үргэлжилнэ. Энэ нь ч цаанаа учиртай. Дариэний хоолой нь Панам, Колумбын хилийг хамарсан уулархаг ширэнгэн ой, намаг, зэвсэгт партизанууд, хар тамхины наймаачид, маш аюултай амьтдаас бүрдэх ямар ч зам байхгүй 106 км-ийн талбайг хамардаг дэлхийн хамгийн аюултай ширэнгэн ой юм. Өнөөдөр та бүхэнд энэхүү аюултай нутгийн талаар хүргэхээр бэлтгэлээ.

Төв Америкийн бүс нутгийн төгсгөл, Панамын сувгаас өмнө зүгт энэхүү бүс нутаг оршино. Дариэний хоолой нь Колумб, Панам улсын нутаг дэвсгэрийг дамнан орших ч бодит байдал дээр тус хоёр орны аль нь ч удирдлагаа бүрэн тогтоож чадаагүй. Ихэнх нутагт нь ямар ч дэд бүтэцгүй, халуун орны өвчин тархсан, аюултай амьтан ургамлаар дүүрэн ширэнгэн ой бүхий намаг голлоно. Хэсэгхэн газруудад цөөн хүмүүс, зэвсэгт бүлгийнхэн оршин суух бөгөөд хааяа аз туршсан цагаачид намгийг гатлахыг оролдох боловч амжилттай болсон нь ховор аж. Иргэншлээс тасарч, хууль ёсноос гадуур үлдсэн энэ газрыг юу тийм аюултай болгодог вэ?

2. "Fer-de-lance" нүхний могой

"Fer-de-lance" нүхний могой нь Дариэний хоолой дахь хамгийн хортой амьтдын нэг юм. Тэд маш түргэн хөдөлгөөнтэйн дээр хүний өвдөгнөөс дээш хүрэхээр урт биетэй. Азаар энэ могойн хорны эсрэг ерөндөг байдаг ч хугацаа алдалгүй эмчлэхгүй бол хатгуулсан газар үхжилд орж, бүр амиа ч алдаж болно. 

3. FARC зэвсэгт босогчид

Колумбын хувьсгалт зэвсэгт хүчин (FARC) 1964 оноос хойш засгийн газрынхаа эсрэг тэмцэж байгаа бөгөөд Колумбын олон хотуудад алан хядах ажиллагаа явуулж нэрд гарсан юм. Өмнө дурдсанчлан хараа хяналт байхгүй Дариэний хоолой тэдний хувьд нуугдах төгс газар болжээ. Шведээс ирсэн үүргэвчтэй аялагч энэ ойгоор явж байгаад 2013 онд толгойдоо буудуулж амиа алдсан бөгөөд хоёр жилийн дараа цогцос нь олдсон юм. Мөн уг хоолойгоор явсан олон хүн хэдэн долоо хоног, сарын хугацаанд ор сураггүй алга болсон байдаг. Босогчид хүмүүсийг барьцаалж, ар гэрийнхнээс нь мөнгө нэхэх замаар өөрсдийгөө санхүүжүүлдэг байна.

2017 онд НҮБ-тай байгуулсан энхийн хэлэлцээрээс хойш тус бүлэглэл улс төрийн албан ёсны нам болж шинэчлэгдсэн боловч хэдэн мянгаар тоологдох босогчид хар тамхи, зэвсэг, хүний наймаа хийсээр байгаа юм.

4. Хар тамхины наймаачид

Хүний хөл хүрэхгүй ийм газраар хар тамхины наймаачид бараагаа зөөх нь түгээмэл. Ямар ч хараа хяналт байхгүй учраас Дариэний хоолой Өмнөд Америкт үйлдвэрлэсэн хар тамхийг АНУ-руу зөөдөг гол цэгүүдийн нэг болжээ. Мэдээж эдгээр наймаачидтай таарвал бараа болон нууц замаа хамгаалах үүднээс тэд өчиггүй таныг  хороох болно.

5. Хар хилэнц

Ийм чийгтэй нөхцөлд чадвартай цөөн тооны хилэнц бий. Тэдэн дундаа хамгийн аюултай нь хар хилэнц юм. Хар хилэнц нь 10 см урт бөгөөд хүрэн хар өнгөтэй, шөнийн цагаар бусад жижиг шавжаар хооллож амьдардаг. Мэдээж хатгуулсан тохиолдолд түргэн эмчилгээ хийлгэхгүй бол аминд хүрнэ. 

6. Бохир ус

Дэриэний хоолойд усны нөөц хангалттай их бий. Гэхдээ нутгийн уснаас уувал та олон төрлийн нян бактериар халдварлах аюултай. Тиймээс сайн ус шүүгч авч явахгүй бол болохгүй.

7. Өргөст чунга мод

Энэхүү модны навчаар тавилга, хувцас, чимэглэл, загасны тор гээд төрөл бүрийн зүйл хийдэг. Гэвч өргөст чунга мод нь өөрийгөө хамгийн сайн хамгаалж чаддаг ургамлуудын нэг юм. Модны өргөс нь 20 см хүртэл ургадаг учраас хүрэхэд маш хэцүү. Мөн өргөс нь олон төрлийн бактеритай учраас хатгуулсан газар маш түргэн хавдаж үрэвсдэг.

8. Хачиг

Хельге Петерсон хэмээх аялагч 80-аад оны дундуур Аргентинаас Аляска хүртэл мотоциклийн аялал хийх үеэрээ Колумбаар дайрчээ. Ийнхүү тэрээр Дариений хоолойг туулах болсон байна. Петерсон Герман гаралтай, залуу аялагчийн хамт явсан бөгөөд тэд Хельгегийн 180 кг хүнд BMW мотоциклийг ширэнгэн ой, гол горхи дундуур зөөж 20 хоногийн аялал хийжээ.

Тэд орой бүр үснээсээ хэдэн зуун хачиг салгаж байсан гэдэг. Панамын бүс дэх хачиг нь Эрлихиоз хэмээх өвчин тээдэг. Үүгээр өвчилсөн хүний биеэр юм туурч, өндөр халуурдаг бөгөөд хэдэн долоо хоног хэвтэрт ордог байна.

9. Нуувчны хөл

Нуувчны хөл хэмээх нэр томьёог цэргүүд Дэлхийн 1-р дайны үед өргөнөөр ашиглах болжээ. Дайны үед  их чийгтэй газраар удаан явсны үр дүнд цусны эргэлт хязгаарлагдаж, хөлийн ул улаан эсвэл цэнхэр өнгөтэй болж улмаар ялзрахыг ингэж нэрлэдэг байна. Мөн шарх нь үрэвсэж, мөөгөнцрийн халдвар авдаг байна. Энэхүү ширэнгээр явсан хүмүүс 10-хан цагийн дотор нуувчны хөлтэй болдог гэнэ. Харамсалтай нь хамгийн ойрын эмнэлэг хэдэн зуун км-ийн цаана бий.

10. Бразилын тэнүүлч аалз

Ширэнгэн ой болсон хойно энд олон төрлийн аалз байх нь мэдээж. Харин Бразилын тэнүүлч аалз тэдэн дундаа хамгийн аюултай. 

Дотроо олон төрөлд хуваагддаг энэхүү аалз нь 12-17 см-ийн урттай. Тэд шөнө ширэнгэн ой модоор аялж, төрөл бүрийн ургамлууд дээр үүрээ засдаг. Гадил жимсний модон доор нуугдах дуртай тул эдгээрийг мөн гадил жимсний аалз хэмээн хочилдог. Хэрвээ та Бразилын тэнүүлч аалзанд хазуулсан бол 2-6 цагийн дотор амиа алдах болно. 

11. Ширэнгийн халуун

95 хувийн чийгшилтэй газарт 35 хэм хүртэл хална гэдэг хүний аминд хүрэх аюултай. Ялангуяа ийм нөхцөлд хүн маш их хөлөрч, шингэн алддаг тул уух зүйл ахиухан базаах хэрэгтэй. Энэхүү нутгийг туулахын тулд 20-50 өдөр зарцуулах хэрэгтэй болдог учраас ямар их ус шаардагдах нь ойлгомжтой.