Ч.Хүрэлбаатар: МҮХАҮТ захиалгаар үйл ажиллагаа явуулдаг улс төрийн байгууллага

2022-10-18 18:04:00

Эдийн засаг, хөгжлийн сайд Ч.Хүрэлбаатар байнгын хорооны хуралдаан дээр Худалдаа аж үйлдвэрийн танхимтай холбоотой асуудлаар байр сууриа илэрхийллээ. 

Тэрбээр, "МҮХАҮТ бизнесийн үйл ажиллагааг зогсоодог, дарамталдаг байгууллага болж хувирсан. Самар экспортлогчдын холбооны хүмүүсээс надад зургаан хуудас орчим гомдол ирсэн. Та нар тэр байгууллагаас мөнгө өг гэж дарамталж байгаа юм билээ. Өөрсдөө нэг төрийн бус байгууллага байгуулаад экспортод гарч байгаа самар болгоноос хураамж авдаг. Гарал үүслийн гэрчилгээ гээд нэг килограмм самар тутамд 10 юань нэхэж байгаа зүйл байна. Тухайн байгууллагыг гишүүн байгууллагуудаас авч байгаа хураамж, сайн дурын үндсэн дээр өгч байгаа хандиваар үйл ажиллагаа явуулах ёстой байгууллага гэж боддог. Гэтэл эсрэгээрээ МҮХАҮТ экспортоо боомилсон, аж ахуйн нэгжээ дарамталсан байгууллага болж хувирсан. Ерөнхийлөгч асан Х.Баттулгын арын өрөөнд л танай байгууллагынхан сууж байдаг байсан. Түүний захиалгаар үйл ажиллагаа явуулдаг улс төрийн байгууллага" гэв.