Хөгжлийн банк энэ онд 800 тэрбум төгрөгийн чанаргүй зээл төлүүлэхгүй бол банкийг дампууруулахад хүрнэ 

2022-05-12 09:15:00

Өчигдрийн Засгийн газрын хуралдаанаар Самурай бондыг иенээр төллөх үүрэг чиглэл өгчээ. Энэ талаар Сангийн сайд Б.Жавхлан мэдээлэхдээ Хөгжлийн банк 2022 онд 800 тэрбум төгрөгийн чанаргүй зээл төлүүлнэ. Чанаргүй зээлүүдийг яаралтай төлүүлэхгүй бол төр бүх зээлийг төлж, банкийг дампууруулахад хүрнэ гэлээ. 

Харин тайлан балансыг 6, 8 дугаар сар гэхэд хэвийн болгож, өр зээлийн 50 хувийг төлүүлж чадвал бондын хүүг төлөх боломжтой. Цаашид Хөгжлийн банк хууль, дүрмээ баримталж ажиллах ёстой. Чанаргүй зээлийг амжилттай төвлөрүүлж чадвал банкны үйл ажиллагаа хэвийн үргэлжилнэ гэв. 

Хөгжлийн банк энэ жил заавал 800 тэрбум төгрөгийн зээл төвлөрүүлэх ёстой.  Зургадугаар сард Хөгжлийн банкинд аудит оруулах юм байна.  Одоогийн байдлаар 260 тэрбум төгрөгийн зээл төлөгджээ. Ирэх сарын 30-ны өдөр гэхэд 450 тэрбум төгрөг шалгалтын өмнө бүрдүүлсэн байх үүрэг өгсөн байна.