АН-ын даргын суудлын төлөөх ширүүн өрсөлдөөн эхэллээ

2025-08-21 16:22:00

Хэсэг чимээгүйхэн байсан улс төрийнхөн энэ долоо хоногоос бужигнаж эхэллээ. Өөрөөр хэлбэл, АН-ын даргын суудалд хэн залрах бол гэх ширүүхэн өрсөлдөөн намын гишүүд дунд өрнөөд байна. 

АН-ын дарга Лу.Гантөмөр Л.Оюун-Эрдэнийн Засгийн газар огцорвол намын даргын ажлаа хүлээж өгнө хэмээн мэдэгдэж байсан. Тэгвэл тэрбээр намын даргын ажлаа хүлээлгэн өгнө гэдгээ өчигдөр намын Улс төрийн зөвлөлийн хурлын үеэрээ хэлжээ. Ийнхүү Ардчилсан нам 300 гаруй гишүүнтэй Үндэсний бодлогын хороогоо энэ сарын 28-нд хуралдуулахаар болоод байгаа билээ. 

Намын даргын ширүүхэн өрсөлдөөн эхэлж, гишүүд фрак фракцаараа хуваагдан удаа дараа уулзалтууд хийж, намын даргад нэр дэвших хүмүүсээ тодруулаад буй сурагтай. 

Одоогийн байдлаар АН-ын даргад эмэгтэйчүүдийн төлөөлөл болж УИХ-ын гишүүн Ж.Баярмаа, АН-ын бүлгийн дарга О.Цогтгэрэл, УИХ-ын дэд дарга Б.Пүрэвдорж, УИХ-ын гишүүн Х.Тэмүүжин, Д.Ганбат, Ц.Туваан, О.Алтангэрэл, Ч.Лодойсамбуу нэр дэвшихээр яригдаад байна. 

Ирэх долоо хоногт АН-ын дарга хэн болох вэ гэх ширүүхэн өрсөлдөөн, халуухан улс төр өрнөх нь ээ.