Голын эрэг дээр амарч байсан иргэдийг хутга тулган дээрэмджээ

2025-06-13 14:56:00

Голын эрэг дээр амарч байсан иргэдийг хутга тулган дээрэмдсэн хэрэг гарчээ. Тодруулбал, зургадугаар сарын 07, 09-ний өдрүүдэд нийслэлийн Баянзүрх дүүргийн 11 дүгээр хороо буюу Туул голын эрэг дагуу амарч, зугаалж явсан иргэдийг дээрэмдсэн талаар дуудлага, мэдээлэл Цагдаагийн байгууллагат бүртгэгджээ.

Дуудлагын дагуу шалгалтын ажиллагаа явуулахад, 22-24 насны хоёр хүн иргэдийн өмчлөх эрхэд халдаж, хутга буюу зэвсгийн чанартай зүйл ашиглан, эд зүйлийг хууль бусаар авсан байж болзошгүй нөхцөл байдал тогтоогджээ.

Одоогоор тус хэргийн мөрдөн шалгах ажиллагаа үргэлжилж байна. Иймд иргэд та бүхэн аялал зугаалгаар явахдаа хувийн аюулгүй байдлаа хангаж, учирч болзошгүй аливаа эрсдэлээс сэргийлэхийг Цагдаагийн байгууллагаас онцгойлон анхаарууллаа.