Баялгаа хуваах гээд саарал ордон завгүй байна

2025-03-21 12:26:00

Олсон орлого, байгуулсан гавьяагаараа хараагддаг шүүгддэг цаг иржээ. Байгаль нь хүртэл баялагтай байсныхаа төлөө сэглүүлж, эргээд сэргэхгүй болтлоо туйлдаж байгаа хөөрхий хүний нийгмийн нэг дүр зураг.

Баялгаас болж асуудал даамжирсаар мөргөлдөөн болж хувирдаг ёсоор өнөөдөр Монголд баялгаа хувааж идэх дотоодын мөргөлдөөн болж байна. Мөргөлдөөн дунд баялгийн хуваарилалттай холбоотой улс төрийн акцууд хөвөрч байна. Үнэхээр ч монголын чухал чухал стратегийн ордуудыг хэдхэн гэр бүл, бизнесийн бүлэглэлүүд хянаж үр ашигтайгаар ажиллуулж ирсэн нь үнэн.

Харин үүнийг Ерөнхий сайд Оюун-Эрдэнэ хаана хаана ямар баялаг хууль бусаар очсоныг тодруул, төрд ав гэж даалгаж, заримд нь зориулж жүжиг хүртэл зохиогоод өнөөдрийн улс төрийн тогоо халуухан байна.

Гэхдээ  тэднээс баялгаа салгаж аваад яах вэ гэдэг бас сонин. Үнэхээр ард түмэнд тэгш хуваарилж ашиг хүртээж чадах уу эсвэл зүгээр өөрийн фракцад биш хүний фракцад байгаа учир ингэж шударга дүр эсгэж байна уу?  Барын амнаас аваад чонын үүрэнд гэдэгтэй адил өөр нэгэн бүлэглэлийн халаасанд орох вий дээ.

Ерөөс монголчууд бид баялгаасаа хувь хүртэж байна гэж жилдээ нэг удаа 100 мянган төгрөг аваад амаа хамхиад суучихна. Тэгэхээр бид яах аргагүй өргөн уудам газар нутаг, хэмжээлшгүй их баялгаа тэгш хуваарилж чаддаггүй ард түмэн нь баялгийн хараалд өртчихсөн хөөрхийлөлтэй улс юм байна.

Одоо баялгийн хараал дээр нэмэгдээд эрх чөлөөгүй болох гэж байна. Эрх чөлөөний үнэ цэнээ мэдрээгүй бид эрх чөлөө рүүгээ нулимж, төр зохицуулаасай, төрийн шийдвэр гэж шүтэж суух аж.

Бидэнд яг одоо эрх чөлөөний үзэл, ёс зүй, зүй ёсны шударга тогтолцоо хэрэгтэй байна. Хувирдаг, хуурдаг, худалддаг, хураадаг, доромжилдог, дарангуйлдаг төр хэрэггүй.

Айлгадаггүй, сүрдүүлдэггүй бизнес хувь хүний ажил үйлсэд хөндлөнгөөс оролцдоггүй хүний үнэ цэнийг, жам ёсны эрх чөлөөг  тунхагладаг төрийн тогтолцоо ус агаар мэт хэрэгтэй байна.

Шударга царайлдаг биш яг шударгаар шүүдэг хуваадаг баймаар байна.