Толгойгоо тоолуулаагүй БОЛ толгойноос салах ялтай юу ДАРГАА!

2024-03-21 14:23:00

Хотын дарга нийтийн тээврийн салбарт парк шинэчлэл хийнэ гээд цочирдом,гайхшрам шийдвэрүүд гаргасаар байна. Түүний гайхалтай шийдвэрүүдийн нэг нь бол автобусанд толгой тоолох. Энэ нь ямар зорилготойг даргаас асуухад “автобусанд дотор хулгай гараад байна шүү дээ хулгайг зогсоох гэсэн нь буруу юм уу” гэж уцаарлангуй хариулав. Толгой тоолдог төхөөрөмж чинь бүүр хулгайчийн толгойг ч таньдаг дэвшилтэт технологитой эд байж.

Уг нь анх шийдвэр гарч байхад автобусанд орсон хүний тоо уншуулсан карт хоёрын тоо нийцэж байх ёстой. Ингэснээр нийтийн тээвэрт очих ёстой мөнгө жолоочийн карманд биш автобусаа сайжруулах чиглэлд зарцуулагдах боломж бүрдэнэ гээд арай эвтэй тайлбар хэлж байсан шиг санагдана.

Гэхдаа даргаа тухайн шийдвэр тань ямар ч зорилготой байсан хүний эрхийг хамгаалсан, иргэнээ ялгаварлан гадуурхахгүй байх талаас илүү боловсронгуй болгоорой гэж хүсье. Түүнээс гадна автобусаа илүү ая тухтай хүртээмжтэй болгох нэн тэргүүний шаардлага байна.

Жишээ нь хүмүүс таван зуун төгрөгөө харамласандаа картаа уншуулахгүй байгаа биш жижигхэн давчуу автобусандаа багтаж суух гэж хичээж буй олны хүчинд шахагдаад уншуулахгүй өнгөрсөн байх тохиолдлыг бодож үзээрэй!

Өглөө оройдоо ажил тарах, цуглах  ачааллын үер автобусанд орох гарах дүрэм үйлчлэх боломжгүй болтол ард иргэд чинь яардаг гэдгийг санаарай!

За тэгээд толгой карт хоёрын тоо зөрчихвөл жолоочийн толгойг авах юм уу толгойгоо тоолуулаагүй иргэнийхээ толгойг авах юм уу гэдгээ тодорхой хэлж өгөөрэй ДАРГАА.