Зудад малчид зүдрээд байна уу улстөрчид зүдрээд байна уу?

2024-02-28 14:51:00

Энэ удаагийн сонгуулиар УИХ-ын гишүүд бүсчилсэн тойргоос сонгогдоно. Тэгэхээр дан ганц аймгийн ард иргэдэд биш баруун бүс бол Увс, Ховд, Завхан, Говь-Алтай гээд олон аймгийн иргэдэд өөрийгөө таниулж нэрээ цээжлүүлэх хэрэгтэй болно. Гэтэл улстөрчдийн аз нь гийж зуд далимдуулж зусардаж явахад амархан болов.

Тэд энэ удаад давхар дээлтэй хөдөөг зорьж байна. Засгийн газрын даалгавраар сонгуулийн тойргуудын дагуу бүсчилсэн эдийн засгийн форум зохион байгуулахын далимд танихгүй сонгогчидтойгоо гар барилцаж царайгаа таниулах алтан боломж гарсан.

Гэхдээ сонгуулийн тухай хуулиар сонгогчдын саналыг худалдаж авах хориотой. Худалдаж авах гэдэгт гурил будаа,  чихэр жимс, бусад бэлэг сэлтийг тараах бүгд багтана.

Ёстой л нөгөө зудаар нохой зоолж, зовлонгоор лам баяжлаа гэгчээр зудыг далимдуулж айл хэсэж гүйгээд мах чануулж идээд, мал мэдэхгүй байж малчдад мал маллах зөвлөгөө өгөөд явах нь үнэхээр попрол биш үү. Үнэндээ цас зудад ядарч байгаа малчдад улстөрчдийн зусар үг, танил царай нь хэрэггүй.

Өвс тэжээл тарааж өгөх Засгийн даалгавар авчхаад хэдэн арвуулаа хэд хэдэн машин хөлөглөж очих хэрэг байна уу. Мэдээж ингээд очихоор монгол хүний зочломтгой зангаар цай хоол бэлдэж зэхэж өгөх нь цас зудын хажуугаар бөөн төвөг л болно. 

Зуд турхантай тэмцэж байгаа мал, малчин хоёроор шоу хийлгүй үүрэгт ажлаа хийгээд ирээрэй.  Малчны хотонд мал мэдэхгүй хүний хошуу дутах хэрэгтэй шүү.