Хотын даргын дараагийн огцом шийдвэр

2024-02-27 10:19:00

Цементэн ширэнгэ болсон Улаанбаатар хотод иргэд амарч, салхилж суух ногоон байгууламж туйлын их үгүйлэгдэж байна. Ямар сайндаа л төв талбай дээр хөлбөмбөгийн тэмцээнд зориулж дэвссэн хуурамч зүлгэн дээр бөөнөөрөө тухалж байх вэ дээ.

Өнгөрсөн онд Улаанбаатар хотын захирагчийн ажлын албанаас нийслэлдээ ногоон байгууламж бүхий зам, талбайг олон болгохоор ажиллаж, “Хотдоо ургуулъя” хөдөлгөөнийг эхлүүлсэн. Мөн Монгол Улсын Ерөнхийлөгчийн “Тэрбум тод” төсөл ч амжилттай хэрэгжиж буй. Гэвч улсынхаа бодлогоос тэс хөндлөн үйл хөдлөлтэй эрх мэдэлтэн байх. Ням гарагт огцом шийдвэр гаргадгаараа алдартай Хотын дарга Х.Нямбаатар Үндэсний цэцэрлэгт хүрээлэнгийн 973 га газрын 3-4 га газарт хоёр дулааны станц байгуулахаар төлөвлөж байгаа сурагтай. Энэ асуудал дээр Хотын дарга НИТХ-ын төлөөлөгч Ү.Оюунзул болон Ус сувгийн удирдах газартай ам зөрөөд буй. Манай нийслэлд ногоон орчин дутагдахын ихээр дутагдаж байгаа. Ийм нөхцөлд Хотын дарга нь ногоон орчинд дулааны станц барих гээд төлөвлөж байгаа нь хэр зохимжтой вэ. Дулааны станц хэрэгтэй юу гэвэл хэрэгтэй. Гэхдээ байршлыг нь дахин нягталж бодох шаардлагатай болов уу.  

Нийслэлийн нутаг дэвсгэрийн хэмжээ 470 мянган га бөгөөд 36287 га нь суурьшлын бүс юм. Үүнээс дөнгөж 637.7 га нь ногоон байгууламж. Одоогоор нийслэлийн хэмжээнд  нэг хүнд оногдох ногоон байгууламжийн хэмжээ 5.5 м2 байна. Гэтэл дэлхийн нэг хүнд оногдох ногоон байгууламж 9 м2 байх стандарттай. Дэлхийн томоохон улс орнуудад энэ тоо стандартаас хавь илүү буюу 16 м2 байх нь бий. Гэвч манай улсын хэтийн зорилго буюу 2025 онд 8 м2 болгохоор зорьж буй нь дэлхийн стандартад ч хүрэхгүй байна. Тиймээс нэмж байгуулахгүй юмаа гэхэд байгаагаа ядаж битгий сүйтгээсэй.