Дижитал технологи чансаатай хөгжилд түлхэц үзүүлж байна

2023-10-31 17:18:00

Аж үйлдвэр, мэдээллийн технологийн яам саяхан тус салбарын 2023 оны гуравдугаар улирлын хөгжилтэй холбоотой тоо баримт нийтэллээ. Тайлант хугацаанд Хятадын мэдээлэл холбооны салбар тогтвортой өсөж, дижитал технологийн дэвшил эдийн засаг нийгмийн чансаатай хөгжлийг эрч хүчээр сэлбэж байна. 

 Аж үйлдвэр, цахим технологи, дижитал технологийн хүчирхэг орон байгуулах засгийн газрын хөтөлбөрийг ажил хэрэг болгож, бодит эдийн засагт ашиглахын тулд хичээж, тодорхой үр дүнд хүрчээ. Тухайлбал, цахилгаан холбооны орлого 6.8 хувьд хүрч тус салбарын орлого өмнөх жилээс 16.5 хувь нэмэгдэж,  үүний үр дүнд нь цахим дэд бүтцийн бүтээн байгуулалт бэхжсэн байна. Өнгөрсөн 9 сарын сүүлч гэхэд 5G сүлжээний 3 сая 189 мянган суурь станц байгуулж,  гигабит хэмжээтэй өргөн зурваст 145 сая өрхийг сүлжээнд холбожээ. Үндэсний хэмжээнд 5G+ аж үйлдвэрийн интернет сүлжээний төсөл 7000 давж, хөдөлгөөнт холбоо ашиглагч 2 тэрбум 220 саяд хүрээд байна. 

Шинэ үеийн холбооны 5G зэрэг тэргүүн технологи нийгмийн олон салбарт гүнзгий нэвтэрч, тэдгээрийн хэрэглээний инновацыг хөгжүүлж, эдийн засгийн хөгжлийн шинэ нөөцийг дайчилж, чансаатай хөгжлийн чухал хөдөлгөх хүч болгов. 

Аж үйлдвэрийн интернет сүлжээний технологи нь эдийн засгийн 45 том салбарт нэвтэрч, хуучин үйлдвэрлэлийн хэв загварыг өөрчилж байна. Ухаалаг үйлдвэр цар хүрээгээ тэлж, үйлдвэрийн бүх дамжлагад ухаалаг технологи нэвтрүүлснээр шинэчлэл хийж байгаа юм. Ингэснээр үйлдвэрлэлийн бүтээмжийг нэмэгдүүлж, бага цагт ихийг үйлдвэрлэх боломжтой болжээ. Бодит эдийн засгийг ийнхүү дижитал, цахим, ухаалаг хэлбэрт шилжүүлснээр өндөр үр ашигтай, хэмнэлттэй, эко үйлдвэрлэл хөгжүүлж байна. 

Хятадын эдийн засаг хамгийн хүчтэй хөгжсөн Жэжян мужаар жишээлж үзэхэд дижитал үйлдвэрлэлийн гол салбарын нэмүү өртөг 8.8 хувь нэмэгдэж, дижитал эдийн засгийн хөрөнгө оруулалт өмнөх жилээс 52.1 хувиар нэмэгдсэн байна. 

Есөн сарын сүүлч гэхэд 5G суурь станцыг мужаас дээших түвшний дунд болон жижиг хотуудад байгуулж, 10 мянган хүн тутамд оногдох  станцын тоо 22.6 болж, 5G сүлжээ эдийн засгийн 67 салбарт нэвтрээд байна. 5G сүлжээний суурь станц аюулгүй, найдвартай ажиллаж, улс орны дижитал хөгжилд баталгаа болж байна.