Б.Батцэцэг: Халимаг иргэн өөрийн хүсэлтээр өнөөдөр Монгол Улсаас гарсан

2023-03-01 14:37:00

Гадаад харилцааны сайд Д.Батцэцэг цаг үеийн зарим асуудлаар мэдээлэл өглөө.

Халимаг иргэн манай улсаас орогнол хүссэн талаар тайлбар өглөө. Тэрбээр "Тус иргэн хоёрдугаар сарын 23-ны өдөр Хүннү эйр компанийн онгоцоор нисэж ирээд, хилийн зурваст зургаа хоносон. Өөрийн хүсэлтээр өнөөдөр Монголоос гарсан" гэв.

Үргэлжлүүлэн тэрбээр "Манай улсын төрийн байгууллагууд хуулийн дагуу ажилласан. Улс руугаа оруулах ямар ч үндэслэл байхгүй. 12.45 цагт манай улсаас өөрийн хүсэлтээр гарсан тул ямар улс руу гарсан талаар бид мэдээлэх эрхгүй" гэсэн юм.

Мэдээллээ үргэлжлүүлэн хэрэгт холбогдсон манай улсын иргэд гадаадын оронд улс төрийн орогнол хүссэн талаарх явдалд ямар арга хэмжээ авах, хэрхдэг талаар тайлбар хийлээ. Тэрбээр "Ямар олон улсын гэрээ конвенцод нэгдсэн байгааг нэн тэргүүнд баримтална. Засгийн газрын авч хэрэгжүүлж буй "Таван Ш" арга хэмжээний хувьд хэрэгт холбогдсон, яллагдагчаар татагдсан, интерполоор эрэн сурвалжилж буй үед гаднын улс орнууд дэмжлэг туслалцаа үзүүлдэг" хэмээлээ.