"Жаст групп" ХХК-ийн захирал Ш.Батхүүд 10 жил хорих ял оноолоо

2022-11-09 11:44:00

Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхэд болсон "Жаст групп" ХХК-ийн захирал асан Ш.Батхүү нарын нэр бүхий таван шүүгдэгчид холбогдох хэргийн гэм буруугийн шүүх хуралдаанаар нэр бүхий иргэдийг гэм буруутайд тооцон шийдвэрлэжээ.

Тус таван шүүгдэгчид холбогдох хэргийн шүүх хуралдаан удаа дараа хойшилсоор ирсэн. Тэгвэл өчигдрийн шүүх хурлаар Ш.Батхүүд 10 жил хорих ял оноож, “Эрдэнэт үйлдвэр”-т учруулсан 105, бусад аж ахуйн нэгжид учруулсан 4 тэрбум гээд нийт 109 тэрбум төгрөг гаргуулан хохирогчдод олгохоор болсон байна. 

Харин Ч.Ганзориг, Б.Мөнхжаргал нарт 14 сая төгрөгөөр торгох ял оноосон байна. Ш.Батхүүтэй хамтарч хуурамч бичиг баримтаар Төрийн банкийг хохироосон гэм буруутай нь тогтоогдсон Э.Сүрэнд 35 сая төгрөгөөр торгох ял шийтгэжээ.