Гашуунсухайт-Ганцмод боомтын хил дамнасан төмөр замын бүтээн байгуулалтыг эхлүүлэх гэрээнд гарын үсэг зурлаа

2025-05-16 14:13:00

Монгол Улс, БНХАУ-ын хооронд 1955 оны хэлэлцээрээр байгуулсан Замын-Үүд, Эрээн төмөр замаас хойш 70 жилийн дараа хийгдэж буй 2 дахь холболтын төмөр замын бүтээн байгуулалтын ажлыг өнөөдөр эхлүүллээ.

Гашуунсухайт-Ганцмод боомтын хил дамнасан төмөр зам барих хэлэлцээрт "Тавантолгой төмөр зам" ХХК-ийн ТУЗ-ийн дарга Б.Артур, "Чайна Энержи Ганцмод төмөр замын хөрөнгө оруулалт" ХХК-ийн ТУЗ-ийн дарга Ван Шанжунь нар гарын үсэг зурлаа.

Гашуунсухайт-Ганцмод хил дамнасан төмөр зам нь 1-р зэрэглэлийн, 1520 мм өргөн цариг, 1435 мм нарийн царигийн хос замтай, гол замын урт 19,5 км, 8-31 метр өндөр дан болон хос замтай гүүрэн байгууламжтай, өргөн царигаар жилд 30 сая.тонн, нарийн царигаар жилд 10 сая.тонн ачаа тээвэрлэх хүчин чадалтай байх ба төслийн нийт төсөвт өртөг 902 тэрбум төгрөг бөгөөд УИХ-ын 2023 оны 68 дугаар тогтоолоор санхүүжилтийг “Эрдэнэс Тавантолгой” ХК хариуцан гүйцэтгэхээр шийдвэрлэсэн юм.