Алслагдсан бүсийн иргэд ХХОАТ-т 1 хувийн татвар төлөх хуулийн төсөл өргөн барина

2025-03-31 13:45:00

Манай улсын баруун бүс сарын дундаж цалингийн хэмжээгээр хамгийн бага буюу улсын дунджаас 22.8 хувиар бага байна. Гэвч улсын дунджаас бага цалинтай хэрнээ шатахуун, өргөн хэрэглээний зарим бараа бүтээгдэхүүний үнэ хэтэрхий өндөр байж ирсэн. Үүнийг өөрчлөхийн тулд ХХОАТ-ын тухай хуульд нэмэлт өөрчлөлт оруулах хуулийн төслийг өнгөрсөн онд УИХ-ын гишүүн С.Бямбацогт санаачилсан. Тэгвэл шинэ парламент үйл ажиллагаагаа явуулж эхэлсэнтэй холбоотойгоор алслагдсан бүсийн гишүүдийн хамтаар дахин өргөн барихаар болжээ.

Тус хуулийн төсөл батлагдвал алслагдсан бүсийн иргэд ХХОАТ-т 10% биш 1% ийн татвар төлдөг болно. Өөрөөр хэлбэл 2 сая төгрөгийн цалин аваад 200 мянган төгрөгөө татварт өгч байгаа бол 20 мянган төгрөг өгдөг болох юм. Мөн хууль батлагдсанаар Улаанбаатарын төвлөрлийг сааруулж, хот хөдөөгийн ялгааг арилгах давуу талтай аж.