Ой тогтоолтын Дэлхийн Аварга Н.Мөнхшүр, Н.Энхшүр нар БНХАУ-ын шилдэг тамирчидтай халз өрсөлдөнө

2023-02-16 16:30:00

Ой тогтоолтын ОУ-ын Их Мастер, Гиннесийн рекорд эзэмшигч, Ой тогтоолтын Дэлхийн Аварга ихэр тамирчид болох Н.Мөнхшүр, Н.Энхшүр нар Хятадын хамгийн их үзэгчтэй Jiangsu телевизийн "The Brain" шоу нэвтрүүлэгт оролцохоор болжээ. Тэд тус шоунд БНХАУ-ын шилдэг хоёр тамирчинтай халз өрсөлдөхөөр болсон байна.

"The Brain" буюу "Super Brain" шоу нь Хятадын мастерууд улс улсын шилдгүүдтэй хүний санаанд ормооргүй тархины гайхамшгийг харуулсан даалгавруудыг гүйцэтгэж өрсөлддөг бөгөөд тус улсын тамирчид Герман, Англи, Америк, Солонгос, Швед зэрэг олон орны шилдгүүдийг ялж байжээ. Тэдний дараагийн учраагаар ийнхүү манай тамирчид тодорч байна.

Дашрамд дурьдахад 2016 онд тус шоунд Монголын Оюун Ухааны Академийн тамирчин, ой тогтоолтын ОУ-ын Их Мастер Э.Энхмөнх оролцон гайхалтай ялалтыг байгуулж байсан билээ. Мөн тухайн нэвтрүүлэг цацагдсан орой 300 сая гаруй хүн үзсэн гэсэн статистик тоо гарч байжээ.