Цагдаагийн газрын ахлах ахлагч С.Ганбаатар 13 дахь өдрөө 403км замыг туулан гүйж УБ-т орж ирлээ

2022-06-23 16:30:00

Тээврийн Цагдаагийн Албаны Төмөр зам дахь цагдаагийн ахлах ахлагч С.Ганбаатар зургаадугаар 10-наас эхлэн Сэлэнгэ аймгийн Сүхбаатар хилийн боомтоос урд цэг Дорноговь аймгийн Замын-Үүдийн хилийн боомт хүртэл 1,111 километр алсын зайд гүйж байгаа. 

Тэрбээр, 13 дахь өдрөө 403 км замыг туулж, "Улаанбаатар өртөө"-нд ирлээ.

Тээврийн Цагдаагийн Албаны Төмөр зам дахь цагдаагийн ахлах ахлагч С.Ганбаатар " 13 хоногийн хугацаанд хад асга, намаг, гуу жалгыг өөрийн биеэр тууллаа. Анх гарахдаа нэлээд саад бартаа туулна гэж тооцоолсон. Өдөрт 40 километр явах болов уу гэж төлөвлөж байсан ч арай амжаагүй. Гэхдээ Дархан өнгөрөөд замд бартаа саад гайгүй болсон. Тиймээс өдөрт 40 километр явсан. Цааш Дорноговь аймгийн Замын-Үүдийн хилийн боомт хүртэл гүйнэ. Наадмын дараа буюу долдугаар сарын 16-нд зорьсон газартаа хүрэх төлөвлөгөөтэй байгаа" гэв. 

Түүний гэргий Ж.Сарангарав "Нөхөр маань авто зам биш төмөр замаа дагаад гүйж байгаа. Анхандаа хол газар явахыг нь зөвшөөрөөгүй. Тиймээс ч өөрөө хамт явах хэрэгтэй гэж бодсон. Уул овоо, жалга, намаг ихтэй газар их таарсан. Нөхрийгөө дагаж явахад заримдаа бэртчих вий гэж их санаа зовдог” гэлээ.