430 хүүхдийн сурах эрхийг булаасан салхи 

2025-09-02 12:14:00

Өнгө алагласан цэцгийн дэлбээдээр гоёсон мянга, мянган Монголын ирээдүй өчигдөр эрдмийн их аяны бас нэгэн даваандаа мордлоо. Эх орны өнцөг булан бүрд хүүхдүүд сургуулийнхаа дээвэр дор цуглаад, дуу шуутай аяндаа мордож байхад алс баруун хязгаар Говь-Алтайн Эрдэнэ сумын 430 хүүхэд  хичээлийн шинэ жилээ наадмын талбайд нээлээ. 

Учир нь 2025 оны 4 дүгээр сарын 10-11нд шилжих шөнө Говь-Алтай аймгийн Эрдэнэ суманд болсон хүчтэй шороон шуурга олон арван айлын амьдралд хүнд цохилт болсон. Байгалийн гамшигт үзэгдлийн улмаас 250 гаруй айлын хашаа нурж, 17 байшингийн дээвэр хуурч, гэр оронгүй болсон иргэдийн зовлон дунд нэгэн чимээгүй гамшиг орхигдсон нь тус сумын Ерөнхий боловсролын сургуулийн дээвэр нурсан явдал байлаа.

Ийн  430 гаруй хүүхэд аюулгүй, дулаан орчинд суралцах эрхээ эдэлж чадахгүйд хүрч дээвэргүй,  нурсан балгас шиг болсон сургууль  хичээлийн үйл ажиллагаа тасалдаж, хүүхдүүдийн боловсрол эзэмших үндсэн эрх зөрчигдөж буй нь хэний ч анхаарлыг татах ёстой асуудал.

Харамсалтай нь, энэ гамшгийн дараах 5 сар өнгөрөхөд ямар ч албан тушаалтан, шийдвэр гаргах эрх бүхий байгууллага сургуулийн дээврийг засах санхүүжилт, арга хэмжээний талаар тодорхой шийдэл гаргаагүй хичээлийн шинэ жилтэй золгож хүүхдүүд жаахан үлдсэн дээврээ бараадан байна. 

Энэ бол зөвхөн энэ сургуулийн нуралтын асуудал биш. Боловсролын салбараа нурангид оруулчихсан нурсан энэ эмх замбараагүй байдлыг засах гэж хичээхгүй байгаа дээдсийн үнэн нүүр царай. Тэд хүүхдүүдийн эрх, аюулгүй байдал, боловсролын хүртээмжийг үл тоож байна. 

Эрдэнэ сумын ЕБС бол зүгээр нэг барилга биш. Энэ бол ирээдүйн Монголын иргэдийг бэлтгэх танхим. Тэнд суралцаж буй хүүхдүүдийн эрхийг хамгаалах нь төр засгийн, орон нутгийн удирдлагын хийх ёстой ажил биш үү? 

Гэтэл төр, төрийн мөнгийг барьж төсөв шийдэж байгаа шийдвэр гаргах албан тушаалтнуудын хэн нь ч энэ 430 хүүхдийн өмнө хариуцлага хүлээх шийдвэр гаргаж өнөөдөр хичээл эхлэхэд ийм байдалтай байгаа нь ямар учиртай вэ? 

УИХ-ын дарга Д.Амарбаясгалан, тойргоо услах дуртай энэ тойргоос гарсан улсын их хурлын эрхэм гишүүдээ, эвсээд засаад залруулаад байх аймгийн засаг даргаа хэн нь ч байсан уухайн тас “нэгдүгээрт-хүүхэд” сонголтыг хийх ёстой байтал та бүгд хэн хэнийхээ улс төрийн имиджийг бодоод хэн нь ч өдий хүртэл, ямар ч хариу арга хэмжээ аваагүй байдаг нь юу вэ? 

Хэдий болтол хамгийн чухал асуудлаа дандаа хандив, гуйлга түйлгээр шийдэх вэ?

Төр тиймхэн чадамжгүй байна гэж болох уу? Сурах эрхээ салхинд булаалгасан хүүхдийн эрхийг АН хариуцах уу, МАН хариуцах уу? Аль нь ч барьж авч шийдэлгүй дундаа харж суутал тэр зуу, зуун хүүхэд хөгжих, хамгаалагдах эрхээрээ хясагдсаар суух уу?  Монголын төр яагаад хүүхдүүдээ хөсөр хаяж байгаа юм бэ?