Хүнгүй ''Хүннү'' хотын дарга нар томилогдсоор

2025-05-02 11:51:00

Бараа нь харагдаагүй ч сурагч сонсогдсоор байгаа Хүннү хот маань тээвэр логистикийн бүстэй болчихлоо. 

Улаанбаатар хотын даац хэтэрсэн гэж үзэн дагуул хотуудыг бүтээж хүн амыг тархан суурьшхад анхаарч Хөшигийн хөндийн нисэх онгоцны буудлыг түшиглэсэн анхны дагуул хот Хүннү хотод тээвэр логистикийн нэгдсэн төвийг нийт 1019 га талбайд барихаар яригдаж буй. Үүнээс 400 га талбайд тээвэр логистикийн бүсийг байгуулна гэнэ. 

Мөн  “Хүннү хотын тээвэр логистикийн бүсийн хөгжлийн стратеги” хэлэлцүүлгээр оролцогчдын санал хүсэлтийг сонсож, тээвэр логистикийн төвийн төлөвлөлтөд тусгах ажлын хэсгийг байгуулж, ажлын хэсгийн ахлагчаар нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагчыг хүртэл томилжээ. 

Ингээд хүнгүй хотын дарга нар томилогдсоор. Хүний амьдрал байхгүй, сургууль, цэцэрлэг, эмнэлэг, инженерийн дэд бүтцээ тодорхой яриагүй атлаа элдэв дарга цэрэг томилсоор. 

Хот босно гэдэг дан ганц барилга барих биш . Гэтэл манай зарим бодлого боловсруулагчид барилга   барина, төр, захиргааны байгууллагуудын нэгдсэн цогцолбор байрна,  олон улсын дээд хэмжээний уулзалт, арга хэмжээг зохион байгуулах цогцолбор байгуулна гэх мэтээр хэт өнгөнд анхаараад байх шиг. 

Улаанбаатар хот хүндээ ээлгүй, утаатай түгжрээтэй, хөрсний бохирдол ихтэй гэдгийг мэдсээр байж дараагийн хотоо хүн төвтэй байхаар төлөвлөх юмсан. Энгийн иргэн тэнд яаж амьдарч болох яаж хөгжих болох тухай төлөвлөгөө юу байна дарга нар аа. Амьдралын хэмнэл үгүй энэ төлөвлөгөөгөө ядаж эхлээд төр засаг дарга цэрэг нь байгаа аймаг сумууддаа туршаад үзвэл дээргүй юу? Бодлого нь бодит амьдралаас тасарсан, иргэн төвтэй биш, тоо төвтэй хот чинь босох эсэх нь эргэлзээтэй байна.