УЛС ТӨРИЙН МАТАРСКОП: Ноорогт хамаарахгүй ноорог

2025-03-19 12:44:00

Аль алинийг тэнцвэртэй мэдээлэх учиртай хэвлэлийн салбар тул арслан бар хоёрын тулаанаас "Ноорог" хэмээх хэвлэл мэдээллийн хэрэгслийг хасаж байгаад ноороглоё.

Анх асуудал ингэж эхэлжээ. Тавантолгойн бүлэг ордын нэг болох "Ухаа худагийг" 2008 онд “Энержи ресурс”-ийн өр төлбөрт өгөх шийдвэрийг Ерөнхий сайд асан С.Баярын үед гаргасны дараа 86 хувийг нь төрд буцааж авсан. Гэхдээ хамгийн их нөөцтэй ордыг нь “MCS”-ийн Ж.Оджаргал тэргүүтэй 11 хүний эзэмшлийн хамтарсан консерциумд өгчихсөн гэдэг.

Харин  Одоогийн Ерөнхий сайд О.Оюун-Эрдэнэ Монгол улсын онц чухал стратегийн орд болох "Ухаа худгийг" хувийн хэвшлээс буцааж авах гэж байгаа нэртэй жүжиг эхэлсэн.

Ухаа гэдэг нь Тавантолгойн бүлэг ордын хамгийн бага зардлаар өндөр чанартай коксжсон нүүрс олборлох 460 сая тонн нөөцтэй асар баялаг орд. Тийм ээ энэ бол баялагийн тулаан.

Эндээс харахад MCS гэх нэг шуналтай мангас улсын өмчийг үрэн таран хийж байхад нь Оюун-Эрдэнэ гэгч нэг баатар мангасыг дарж өгөх гэж байгаа дүртэй жүжиг.

Хэний талд илүү эрх ашиг байх, ямар учраас,яагаад гэх мэт асуултад тодорхой хариулт өгөхгүйгээр биднийг харанхуй байлгаж дунд нь яс хаяж ясан дээрээ зодолдож байх хооронд нь хоолоо хувааж иддэг улстөрийн жигшим үйл явдалд хэрсүү хандацгаая. 

Энэ удаагийн томчуудын тулаан "Ноорог" гэх сайтаар дамжуулан хэвлэл мэдээллийн салбарт хагарал үүсгэв. Бид одоо "Ноорог"-ын мэдээлсэн зүйлийг дамжуулбал MCS-ийн эрх ашгийг хангагчид "Ноорог"-ийн эсрэг талын мэдээллийг дамжуулбал Ардын намын ул долоогч, Оюун-Эрдэнэ, Баатар нарын жүжгийг хамгаалагчид болж хувирав.

Гэтэл бид тусдаа эрх ашигтай, тусдаа үзэл бодолтой, олон нийтийн мэдэх эрхийг хангах үүрэгтэй ДӨРӨВДӨГЧ ЗАСАГЛАЛ ШҮҮ.  

Н.ЦАЦАА