Спикерийн битүү үгс

2025-03-17 14:53:00

УИХ-ын хаврын чуулганыг нээж УИХ-ын дарга Д.Амарбаясгалан үг хэлэхдээ хэд хэдэн битүү утга бүхий үгс чулуудав. Жишээлбэл, Улсын Их Хурал мега төслүүд хэрэгжих эрх зүйн үндсийг  бүрдүүлэхэд онцгой анхаарч, улс орныхоо хөгжил дэвшлийн төлөө хамтарсан Засгийн газраа бүрэн дэмжиж ажиллах нь зүйтэй. Засгийн газар юунд төвлөрч, ямар үр дүнд зорьж, яаж ажиллахыг бид батлаад, ердөө 6 сарын нүүр үзэж байна.

 Улс төржилт, намчирхал, талцал хуваагдал гэхээсээ илүү шинэ тогтолцоогоор бүрдсэн 126 гишүүнтэй парламент улс орны хөгжлийг хурдасгах шийдвэрүүд гаргацгаая гэв. Энэ нь мэдээж УИХ-ын 126 гишүүдийг эвтэй байж,  нам харгалзахгүйгээр улс орны хөгжлийн төлөө гэсэн санаа боловч жинхэнэ цаад утга нь сөрөг хүчингүй шинэ МАНАН-г өөгшүүлэх мэт.

Мөн  геополитик, эдийн засгийн харилцааны эгзэгтэй энэ цаг үед Улсын Их Хурал төрийн эрх барих дээд байгууллагын хувьд төрийн бодлогын тогтвортой байдал, тууштай хэрэгжилтийн зарчмыг баримталж, үндэсний эв нэгдэл, гадаад бодлогын тогтвортой байдал, институц хоорондын үйл ажиллагаа, уялдаа холбоог дэмжиж, төрийн үйл ажиллагааны салаа мөчир бүрд зөв хандлагыг харуулах шаардлагатай байна гэх мэт үгээрээ Ерөнхий сайдыг огцруулах, засгийн эсрэг ямар ч эв түнжингүй саналыг дэмжихгүй гэдгээ ардчилсан намын хэсэг бүлэгт мэдэгдэж авав.

Мэдээж УИХ-ын даргын хувьд тэр төвийг сахих ёстой. Төвийг сахисан мэдэгдлээ ч хийв. Ангийн даргын хувиар ирцээ таслахгүй байхыг ч сануулав, эв эеэ баримтлахыг ч шаардав.

Н.ЦАЦАА