Соёлын сайдад хаяглав

2025-02-24 12:28:00

3.5 сая хүн ам нь 1,5 сая км өргөн уудам газарт тархан суурьшсан төв Азийн цээжинд орших, бахархам түүх, хөрс шороо, үржил шим, уурхай баялагийн охь болсон Монгол улсын иргэн би Соёлын сайддаа хаяглав.

Эх түүхийн эзэн болсон эзэн Чингисийн удам бид энэ том үржил шимт  нутагтаа жижгэрч амьдарч байна. Угтаа монголчууд бид чинь бараг байгалийн баялгаасаа илүү гарахаар асар баян түүх соёлтой том ард түмэн.

Өнгөлж тордож чадвал хувь хүний унаган чадвар дэлхийд гайхагдана. Тамирчид, урлагийнхан, эрдэмтэд гэх мэт.  Гэтэл Монгол хүнд байгалаас заяасан төрөлх авъяас чадварыг энэ Засгийн газар, түүний зохион байгуулалтын хэлбэр тэтгэж, торниулж чадахгүй, харин ч эвдэж, муу муухай харагдуулж байна.

Өнгөрсөн  жилүүдэд жуулчдын тоог нэмэх гээд олон ажил санаачлав. Хөшөө босгож үзээд хүмүүст таалагдахгүй байхаар нь нурааж нэг үзлээ. Гадаадаас урлаг соёлын одод авч ирж нөлөөллийн ажлууд хийхээр оролдов. Гэвч Монгол Улс байдгийн баруун хаяандаа. Алдаа нь хаана байгаа нь маш ойлгомжтой. Соёлыг түгээн дэлгэрүүлэх, нутагшуулах, гадагш сурталчлах үүрэгтэй Ч.Номинд сайдад алдаа байна. Жишээ нь:

“Сэргэлэн охин Ян Сунь” киноны Хан Ки Тэгийн дүрээр Монголчуудын сайн мэдэх "А" зэрэглэлийн жүжигчин Жан Хёг болон нэвтрүүлгийн бусад жүжигчид “Couriers in Mongolia” нэвтрүүлгийн зураг авалтанд оролцохоор Монголд ирэв. Ирсэн жүжигчдийг хөдөөгийн айлд аваачин хатуу мах зулгаалган идүүлж, балга усаар нүүрийг нь угаалгаж, монгол айлд заавал баруун хөлөөрөө давж алхаж орох ёстой, усанд явах машин асахгүй байна түрээрээ гэх мэтчилэн өнөө түүх ихт монгол улсын ард түмнийг учиргүй ядуу буурай мэт харагдуулж эхлэв. Үүнд соёлын сайд та хяналт тавих байсан.

Мөн “Nas Daily” гэх влогоор олонд танигдсан цахим сүлжээнд 40 сая гаруй дагагчтай контент бүтээгч Нусейр Ясин монголд ирэхэд тэдний багт монголыг хангалттай таниулах юуг ч бэлдээгүй байв. Сур харваа, морьт баатруудын үзүүлбэр гэх мэт тэдний сэтгэлд Монгол гэж ийм улс юм аа гэж хоногштол юу ч үзүүлсэнгүй. Иргэн миний төсөөллөөр Их эзэн Чингис хааны нутагт 1000 морьтон баатар цуглуулж дайны болон тулааны урлаг харуулах морьт үзүүлбэр үзүүлж болох байсан, 10 мянган уртын дуучдыг цуглуулж тал нутгаа цууриаттал дуулуулж болох байсан. Буудалласан амралтын газар, зочид буудлуудад нь монголыг сурталчлах тууль хайлах, монгол бүжиг, уран нугаралтын үзүүлбэр, сур харваа, шагайн наадгай гээд монгол гэх юу байна түүнд төсөв зарцуулж хамаг сайхнаа үзүүлээд тэдний дэлгэцэнд буулгаад үлдээж болох байсан.

Үүний дараагаар Tik Tok дээр  2 сая дагагчтай, Instagram дээр 500 мянган дагагч бүхий Солонгос улсын Plus Size моделиуд, үргэжлээд “Full house”  олон ангит киногоороо дэлхийд алдаршсан инстаграммд 3,3 сая дагагчтай жүжигчин дуучин “Rain” түүний хамт кpop оддын төлөөлөл 2ne1 хамтлагийн дуучин “Sandаra Park”, реппер “Bloo” нар ирэв.Түүний дараа инстаграмм хуудсандаа 8.8 сая дагагчтай.Hwasa буюу Ан Хе Жин монголд ирсэн. Орчин цагийн даяарчлагдсан дэлхийд энэ их дагачидтай нөлөөлөгч хүмүүс ирж байхад үзүүлсэн үзүүлбэрт нь ангайж шагшираад өөрсдөө юу ч үзүүлж харуулахгүй утаа, тоосоо манаргаж байгаад явуулж байгаа бид хохино л болж үлдэж байна.

 Дээрх хүмүүсийн дагагчид нийлээд 50  сая орчим болно. Тэд дам дамаа дамжуулахад 400 сая жуулчин чинь хүрээд ирэх нь цаг хугацааны асуудал. Харин 400 сая жуулчин авч ирнэ гэж томорч суухын оронд эхлээд тэдэнд юу үзүүлэх, хаана байлгах, юу идүүлэх, хаагуур явуулахаа эхлээд бэлдье. Тэдэнд үйлчлэх, тэдэнтэй ярилцах соёлтой, боловсролтой ард түмнээ эхлээд торниулъя. Саалиа бэлдэхээр саваа бэлд соёлын сайд аа.