Боловсролын зээлийн санд 4.2 тэрбум орчим төгрөгийн зээл эргэн төлөгдөөд байна

2024-02-27 09:54:00

Боловсролын Зээлийн Сангаас олгосон зээл, тэтгэлгийг шалгах ажлын хэсгээс хэрэг бүртгэлтийн 7, мөрдөн байцаалтын хоёр хэрэгт мөрдөн шалгах ажиллагаа явуулж байгааг Прокурорын байгууллагаас мэдээлжээ. 

Тодруулбал, 1997-2023 онд гадаад улсын их, дээд сургуулийн бакалавр, магистр, докторын  хөтөлбөрт суралцах 3,069 хүнд олгосон 230.1 тэрбумын, 941 суралцагчийн 47.1 тэрбум төгрөгийн зээлийг чөлөөлсөн үндэслэлийг нэг бүрчлэн шалгаж байгаа юм. Энэ хүрээнд 2,288 суралцагчийн хувийн хэрэг, материалтай танилцаж, 1,600 гаруй хүнээс гэрчийн мэдүүлэг авч, 1,494 суралцагчийн хувийн хэргээс 2,500 орчим зөрчлийг илрүүлсэн байна.

Мөн улс төр, урлаг соёлын зэрэг нөлөө бүхий хүмүүстэй хамааралтай 364, үүнээс зөрчилтэй 262 суралцагч байгаа болохыг тогтоожээ.

Ажлын хэсэг байгуулагдсанаас хойш мөрдөн шалгах ажиллагааны явцад нийт 220 суралцагчийн 1.2 сая ам.доллар буюу 4.2 тэрбум орчим төгрөгийн зээл эргэн төлөгдсөн байна.