Монгол улсад анх удаа тариалсан цагаан будаа “Хөсөг” нэртэйгээр худалдаанд гарна

2021-11-16 12:46:00

ХХААХҮ-ийн сайд З.Мэндсайхан болон газрын дарга нар цаг үеийн асуудлаар мэдээлэл хийлээ.

Өнөөдрийн байдлаар ургац хураалт 97 хувьтай байгаа юм байна. Дотоодын хэрэгцээг хангах хэмжээний төмсийг бүрэн хураажээ. Өмнө нь жилд 310 мянган тонн хурааж авдаг байсан бол энэ удаад 547,2 мянган тонн хураасан байна.  Хүнсний ногооны 99,1 хувийг хураасан буюу энэ нь 110 мянган тонн бөгөөд өмнө нь дотоодын хэрэгцээний 47  хувийг хангадаг байсан бол энэ жил 60 хувийг хангах боломж бүрдэж байна гэж салбарын сайд нь мэдээллээ.

Мөн Монгол улс анх удаа цагаан будаа тариалж, иргэдийг гарт хүргэхэд бэлэн болоод байгааг ХХААХҮ-ийн сайд З.Мэндсайхан хэллээ. Тэрбээр, “Хувийн хэвшлийн Жимекс компани 2 га газраас 10 тонн цагаан будаа хурааж авсан. Бага мэт сонсогдож байгаа ч энэ нь сайн зүйлийн эхлэл юм. Дотоодод тарьж ургуулсан цагаан будаа "Хөсөг" нэртэйгээр та бүхний гар дээр очно” гэв.