Зодож, хүчээр машинд суулгаж эд зүйлсийг нь дээрэмджээ

2025-08-27 09:55:00

Наймдугаар сарын 13-14-нд шилжих шөнө Сонгинохайрхан дүүргийн нутаг 5-р хороонд “4  этгээд намайг нийлж зодоод машинд хүчээр суулгаж авч яваад дээрэмдчихлээ” гэх дуудлага мэдээлэл цагдаагийн байгууллагад бүртгэгджээ.

Дуудлагын дагуу цагдаагийн алба хаагчид шуурхай ажиллаж, мөнгөлөг саарал өнгийн Приус-30 маркийн улсын дугааргүй тээврийн хэрэгсэлтэй, үл таних 20 орчим насны 4 эрэгтэй, ганцаараа явж байсан эмэгтэй хүнийг зодож, айлган сүрдүүлж, хүчээр машинд суулгаж гар утас, үнэт эдлэл зэргийг дээрэмдсэн хэргийг илрүүлж мөрдөн шалгах ажиллагааг үргэлжлүүлж байна. Дээрх этгээдүүд нь унаж явсан тээврийн хэрэгслээ түрээслэн дээрх гэмт хэргийг үйлдсэн байна.

Дээрэмдэх гэмт хэрэг үйлдэж буй этгээдүүд нь согтууруулах ундааны зүйл хэтрүүлэн хэрэглэж биеэ авч явах чадваргүй болсон иргэдийг болон гэрэлтүүлэггүй гудамж, талбайд ганцаараа зорчиж буй иргэдийг олзлон тэдэнд хохирол учруулдаг тул иймд иргэд шөнө оройн цагаар явахдаа сонор сэрэмжтэй байх, аль болох гэрэлтүүлэгтэй, хяналтын камертай замаар зорчиж гэмт хэргийн хохирогч болохоос урьдчилан сэргийлээрэй.