ХЭН ЮУ ХЭЛЭВ: Ноорог-ийн залуусын асуудал юу болов?

2025-03-19 14:42:00

"Ноорог"-ийн залуусын асуудал сүүлийн үеийн трэнд сэдвийн нэг болж байна. Өчигдөр "Ноорог"-ийн ажилчид болон тэдний өмгөөлөгчид, Ардчилсан намын хэсэг бүлэг гишүүнд мэдээлэл хийхдээ цагдаагийн байгууллага мөрдөн шалгах процессын алдаа гаргасан биднийг хууль бусаар шалгасан, хэвлэн нийтлэх эрх чөлөөнд халдлаа гэж мэдээлж байсан бол өнөөдөр хууль зүй дотоод хэргийн сайд О.Алтангэрэл "Ноорог"-ийн залуусын хэрэг гэнэт өчигдөр шалгасан асуудал биш тэд үнэхээр бусдыг амиа хорлоход хүргэсэн болон цахим мөрийтэй тоглоом зохион байгуулсан хэргээр 2024 оны 6-р сараас хойш шалгагдаж байгаа тухай хэллээ. 

О.Уламсайхан: Бид хэнийг ч хохироогоогүй учир айх зүйл алга

"Эрүүгийн хуулийн 19.9.1 буюу Үндэсний эв нэгдлийг бусниулсан гэсэн шалтгаанаар шалгаж байна гэж мэдээлсэн. Биднийг өмгөөлөгчтэй маань уулзуулах боломж олгоогүй. Бид өмнө нь арванхоёрдугаар сарын 31-ний өдөр мөн Кибер гэмт хэрэгтэй тэмцэх газарт ирж байсан.

Мөн биднийг MCS-тэй хамтардаг гэсэн мэдээлэл гарсан байна. Бид тэдэнтэй хамтарч ажиллаж байсан. Монголд MCS, АПУ-ийн дүрсийг авч байгаагүй газар гэж байхгүй байх. Ингэж л маркетинг хийдэг. "Ноорог" бол шинэ, залуу баг. Бидэнд сонгууль маш чухал үйл явдал байсан. Бид сурталчилгааны хугацаанд аль нэг нэр дэвшигч эсвэл намыг биш, энгийн зургаан хүнийг дагаж ажилласан. Ингэхдээ бид киногоороо тухайн тойрогт ухуулагч нар яаж ажиллаж байна, сонгогчдын боловсрол ямар байна гэдгийг л харуулах гэж зорьсон. Бид киногоо бүтээхдээ 80 орчим сая төгрөг гаргасан. Үүний 30 гаруй сая нь олон нийтийн хандиваас боссон.

Манай оффисоос хураасан эд зүйлсийн жагсаалтыг бидэнд өгөөгүй. Гар утас, хувийн эд зүйлсийг хурааж авсан. Зарим хүмүүсээс кодыг нь асууж байгаад, хувийн мэдээллийг нь харсан. Хоорондоо юм ярихыг хориглосон.

ЦЕГ: Ноорогийн залуусыг баривчлаагүй

 Цахим орчинд “Ноорог” гэх нэртэй фейсбүүк пейж хаягаас бусдын нэр хүндэд халдаж худал мэдээлэл тараасан гэх гэмт хэргийн талаарх мэдээлэлд мөрдөн шалгах ажиллагаа явуулж байна. Мөрдөгчөөс нэр бүхий иргэдийг шүүхийн зөвшөөрөлгүй баривчлах санал гарган ирүүлснийг прокурор танилцаад хуульд заасан баривчлах үндэслэл тогтоогдоогүй гэж үзэн, сэжигтнийг хойшлуулшгүйгээр баривчлахаас татгалзаж шийдвэрлэсэн. Ноорогийн залуусыг баривчлаагүй.

ӨМГӨӨЛӨГЧ Б.НАРАНЦЭЦЭГ: Ноорог-ийн залуусыг мөрдөн шалгах ажиллагаанд процессын алдаа гарсан

Ажлын цаг дууссан хойно  хойшлуулшгүй гэж гар утсыг нь хурааж авсан. Оффист нь нэгжлэг хийж, гар утсанд үзлэг хийсэн. Мөн хэнээс ч асуухгүйгээр хаана байгааг нь шууд мэдэж, олж ирсэн зэргээр ярих зүйлүүд бол мөрдөн шалгах явцын процессын алдаа мөн.  Одоогоор зүйлчлэл тодорхойгүй учир үүнийг хэвлэн нийтлэх эрх чөлөөнд халдсан гэж үзэж байна. Мөн шөнийн 22.00 цагаас өглөөний 07.00 цаг хүртэл мэдүүлэг авсан нь хүний эрхийн зөрчил мөн. Үүн дээр хүний эрхийн мэдрэмжтэй хандах ёстой байсан. Найман ажилтныг байцааж, өглөө 06.30 цагт явуулсан гэв.

Процессын хэд хэдэн зөрчил гарсныг өмгөөлөгчид хэлж байна. Тухайлбал залуусыг ПС тоглоомын газар тоглож байхад нь ирж баривчилсан. Тэдний байршлыг яаж мэдэж очсон бэ гэдэг нэг зөрчил. Хоёрдугаарт нь прокуророос зөвшөөрөл аваагүй байна. Шалгаж буй үндэслэлийн дагуу үүссэн нөхцөл байдал байхгүй.

ХУУЛЬ ЗҮЙН САЙД О.АЛТАНГЭРЭЛ:  Цагдаагийн байгууллага буруу юм хийгээгүй хэрэв алдаа байвал би хариуцлага хүлээнэ

Шалгагдаж байгаа нэр бүхий хүмүүс 2024 оны зургаа, есдүгээр сард Эрүүгийн хуулийн тусгай зүйл ангиар шалгагдаж байсан. Хэрвээ Цагдаагийн өгсөн мэдээлэл буруу ташаа байх юм бол Эрүүгийн хариуцлагад татагдана. Тиймээс Цагдаагийн байгууллагаас өгсөн мэдээлэл цаанаа хариуцлагатай байдаг. Алба хаагчид хуулийн хүрээнд л мэдээлэл өгсөн.  

Өмгөөлөгчдийн хэлж буйгаар процессын алдаа гарсан бол гомдол гаргаад явах бүрэн эрхтэй. Цагдаагийн байгууллагад өргөдөл гомдол ирсэн бол шалгах үүрэгтэй. Хуулийнхаа хүрээнд ажлаа хийж байгааг буруутгаж болохгүй. 

Цагдаагийн газрын байгууллагаас авсан мэдээллээр  шалгагдаж байгаа зургаан хүний дансаар нийтдээ 9.3 тэрбум төгрөгийн цахим мөрийтэй тоглоомын гүйлгээ дамжсан байна. Үүнтэй холбоотойгоор 2024 оны есдүгээр сараас эхлэн Эрүүгийн хэргийн заалт буюу бусдыг амиа хорлоход хүргэсэн заалтаар шалгагдаж байгаа. Цаана нь хохирогч байгаа шүү.